Martın 14-də Naxçıvan Muxtar Respublikasının gənclər və idman naziri səlahiyyətlərini icra edən, nazir müavini Məcid Seyidov və qurumun məsul əməkdaşlarının iştirakı ilə Culfa şəhərində vətəndaşların müraciətlərinə baxılıb.

Qəbuldan öncə Məcid Seyidov Culfa Rayon İcra Hakimiyyəti başçısının müavini, başçı səlahiyyətlərini müvəqqəti icra edən Sara Hüseynova ilə birgə ümummilli lider Heydər Əliyevin abidəsini ziyarət ediblər. Abidə önünə gül dəstəsi qoyulub, dahi şəxsiyyətin  xatirəsi ehtiramla yad edilib.

İcra Hakimiyyətində reallaşan qəbul zamanı vətəndaşların fikir, təklif və şikayətləri dinlənilib. Müraciətlər əsasən, rayon ərazisində idman infrastrukturunun yenilənməsi, yeni məşq bölməsinin yaradılması, işə qəbul və digər məsələlərlə bağlı olub.

Nazir müavini vətəndaşların diqqətinə çatdırıb ki, “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı” çərçivəsində, o cümlədən paralel olaraq həyata keçiriləcək idman infrastrukturu layihələri Culfa rayonunu da əhatə edəcək. Belə ki, Dövlət Proqramına uyğun olaraq rayon mərkəzində açıq hava idman qurğularının quraşdırılması, eləcə də Azərbaycan Respublikası Gənclər və İdman Nazirliyinin “Sağlam məhəllə” layihəsi çərçivəsində idman meydançasının inşa edilməsi nəzərdə tutulub.     Bundan başqa, özəl investisiya hesabına universal qapalı idman obyektinin inşa edilməsi istiqamətində işlər görülməkdədir.